Сеченов номидаги институт олимлари Россиянинг жанубий вилоятларида хавфли Қрим-Конго геморрагик иситмасининг янги штамини аниқлади. Бу ҳақда «Газета.ru» хабар берди.

Маълум қилинишича, касалликдан ўлим даражаси 50 фоизгача етиши мумкин. Мазкур касаллик Африка, Яқин Шарқ ва Болқон мамлакатларида кенг тарқалган бўлиб, у одамларга уй ҳайвонлари ва бошқа касалланганлардан юқади. Шу билан бирга, ушбу вирусга қарши вакциналар ҳали мавжуд эмас.

«Вируснинг турли хил вариантлари касалликнинг турлича кечишига сабаб бўлади. Тадқиқотлар натижасида Россия ҳудудларидан ўрганилган вирус штамлари ‘Европа-1’ (596 та намунада), ‘Африка-3’ (фақат битта намунада), шунингдек, бутунлай янги ‘Европа-3’ линиясига (олтита намуна) алоқадорлиги аниқланди», дейилади хабарда.

Таъкидланишича, штамлар ичида «Европа-1» энг хавфлиси ҳисобланади.

Аввалроқ ЖССТ 33 мамлакатда болалар орасида келиб чиқиши номаълум бўлган гепатит аниқланганидан ва UNICEF болаларда учрайдиган юқумли касалликдан огоҳлантирганди.