Ўзбекистонда 1 июлдан электр ва газ нархи ошириладими?
Энергетика вазирлиги 1 июлдан бошлаб электр ва газ тарифларига ўзгартиришлар киритилмаслигини маълум қилди. Бу ҳақда вазирликнинг расмий Telegram каналида хабар берилди.
Қайд этилишича, жамоатчилик муҳокамасига қўйилган Вазирлар Маҳкамасининг «Ёқилғи-энергетика ресурслари нархларини ўзгартириш тўғрисида»ги қарори лойиҳаси ишчи гуруҳ томонидан ўрганилмоқда.
Мазкур лойиҳа доирасида фуқаролардан мингдан ортиқ мурожаат келиб тушган бўлиб, айни пайтда Энергетика, Молия, Иқтисодий тараққиёт ва камбағалликни қисқартириш вазирликлари мутахассислари томонидан ўрганилиб, таҳлил қилинмоқда.
Мавзуга доир: Электроэнергетика соҳаси эркин бозорга ўтгандан сўнг вилоятларда турлича нархлар шаклланмайди
Қабул қилинган таклифлар бўйича барча хулосалар ва мутахассисларнинг хулосалари тақдим этилгандан сўнг, ушбу масала бўйича якуний ва тегишли қарор қабул қилинади.
Қабул қилинган меъёрий-ҳуқуқий ҳужжатларга кўра, тарифларнинг ўзгариши ҳукумат қарори қабул қилинган кундан бошлаб 15 кундан кейин кучга киради.
Эслатиб ўтамиз, 2022 йил май ойи охирида Ўзбекистон электр энергияси ваз газ учун тўловлар оширилиши тўғрисида хабарлар тарқалганди. Энергетика ва Молия вазирликлари мазкур хабарлар юзасидан тушунтириш бериб, тегишли қонун лойиҳаси ишлаб чиқилаётганини маълум қилган.
