Тошкент шаҳар Яккасарой туманида масжидга пневматик қурол билан келган эркак ушланди. Бу ҳақда Миллий гвардия Тошкент шаҳар матбуот хизмати хабар берди.

Маълум қилтинишича, Яккасарой туманидаги «Усмон бин Маъзун» масжидига жума намозини ўқиш учун келган фуқаролар хавфсизлигини таъминлаш ва жамоат тартибини сақлаш учун туман Ички ишлар органлари фаолиятини мувофиқлаштириш бошқармаси ходимлари ва Миллий гвардия ҳарбий хизматчилари жалб қилинган.

Тахминан соат 12:45 да Миллий гвардия ҳарбий хизматчилари томонидан хавфсизлик юзасидан масжидга кираётган фуқароларнинг ёнида бўлган буюмлари текширилган вақтда 1996 йилда Тошкент шаҳрида туғилган фуқаро Р.М.нинг қўлида бўлган қора рангли «барсетка»сининг ичида «тўқ яшил» рангдаги пневматик қурол ва овоз сўндиргич борлиги аниқланган.

Бундан ташқари унга тегишли бўлган Instagram ижтимоий тармоғида тақиқланган турли видео материалларни жойлаш орқали, ўзининг обуначиларига ҳавола қилиб келгани маълум бўлган.

Ҳозирда ҳар иккала ҳолат юзасидан ҳужжатлар расмийлаштирилиб, суд техник ва адабиётшунослик экспертизаларига тақдим қилиш чоралари кўрилмоқда. Мазкур ҳолат юзасидан суриштирув ишлари ДХХ ходимлари билан ҳамкорликда амалга оширилмоқда.

Аввалроқ Наманганда жанговар қурол сотмоқчи бўлган фуқаро қўлга олингани ҳақида хабар берилганди. Бундан ташқари, Ўзбекистонда қуролдан фойдаланиш ёши 25 ёш этиб белгиланаёгани маълум қилинганди.