Россия БМТ Хавфсизлик Кенгашини кенгайтиришга чақирди
Россия дипломати Пекинда бўлиб ўтган БМТ Глобал тинчлик форумида ташкилот Хавфсизлик кенгашини кенгайтиришга чақирди. Бу ҳақда «РИА Новости» хабар берди.
Унинг сўзларига кўра, ҳозирда бу ташкилот ғарблик ҳамкасбларнинг «тарғибот-ташвиқот» олиб борадиган майдонига айланган.
«Бу қадамлар Хавфсизлик Кенгаши аъзоларини янада узоқлаштириб, унинг иш самарадорлигини пасайтиради. Бундай вазиятда БМТни ислоҳ қилиш зарурати муҳим масала. Россия кенг консенсус асосида БМТ Хавфсизлик кенгаши таркибини кенгайтириш тарафдори. Бунинг учун Африка, Осиё ва Лотин Америкаси давлатларининг улушини ошириш зарур, токи Хавфсизлик Кенгаши дунё халқларининг интилишларини акс эттира олсин ва янада демократик бўлсин», — деган Россиянинг Хитойдаги элчиси Андрей Денисов.
Шу билан бирга, дипломат Россия Германия ва Япониянинг Хавфсизлик Кенгашига киритилишини қўллаб-қувватлашга тайёр эмаслигини, чунки бу ички мувозанатни ҳеч қандай тарзда ўзгартирмаслигини таъкидлаган.
Эслатиб ўтамиз, аввалроқ Украина президенти Россияни БМТ Хавфсизлик кенгашидан сиқариб ташлашга чақирганди. Дмитрий Медведев Зеленскийнинг бу чақириғига жавоб қайтарганди.
