Украина яна бир ташкилотга аъзолик учун ариза топширди
Украина бош вазири Денис Шмигаль мамлакат номидан Иқтисодий ҳамкорлик ва тараққиёт ташкилотига аъзо бўлиш учун ариза топширди. Бу ҳақда у ўзининг Telegram каналида маълум қилди.
Шмигаль Украинанинг ташкилотга аъзо бўлиш тўғрисидаги аризани Бош котиб Матиас Корманга топширган.
«Умид қиламизки, Иқтисодий ҳамкорлик ва тараққиёт ташкилоти кенгаши бизни имкон қадар тезроқ аъзоликка қўшилишимиз учун ушбу ҳужжатни кўриб чиқади», — деган Украина бош вазири.
У ариза топшириш Луганодаги конференция доирасида Украинани қайта тиклаш режасини амалий амалга ошириш муҳокамасида содир бўлганини айтган.
«Украина ташкилотнинг барча мақсадлари ва қадриятлари билан ўртоқлашади ва имкон қадар тезроқ унга қўшилишга интилади. Украинанинг ташкилотга аъзолиги мамлакат тикланиши ва ривожланиши асосларидан биридир», — дея қўшимча қилган вазир.
Эслатиб ўтамиз, Украина президенти Владимир Зеленский 28 февралда мамлакатнинг Европа Иттифоқига аъзо бўлиш тўғрисидаги аризасини имзолаган. 17 июнь куни Еврокомиссия Европа кенгашига Украинага ЕИ аъзолигига номзод мақомини беришни тавсия қилган. Европа кенгаши 23 июнда Украинага ЕИга аъзоликка номзод мақомини берган. Молдова ҳам бу мақомни олган.
