«Artel» «M.Video-Eldorado» билан шартнома имзолади
Компания тўғри стратегия орқали Россия бозорини 5 фоизгача эгаллаши мумкин
«Artel» компанияси Россиянинг электроника ва маиший техника бозоридаги энг йирик чакана сотувчиларидан бири ҳисобланган «M.Video-Eldorado» билан шартнома имзолади. Бу ҳақда компания ахборот хизмати «Bugun.uz»га хабар берди.
Музокаралар натижасига кўра, «Artel» компанияси «M.Video-Eldorado» билан маиший техника етказиб бериш бўйича шартнома имзолади. «Holodilnik.ru» тижорат директори Алексей Погудаловни «Kommersant.ru»га берган интервьюсида, «Artel» тўғри стратегия орқали Россия бозорини 3 фоиздан 5 фоизгача эгаллаши мумкинлиги ҳақида фикр билдирди.
Июль-август ойларида совуткичлар, музлаткичлар, кир ювиш машиналари, телевизорлар, печкалар, чангютгичлар ва кондиционерлар ўртача нарх оралиғида биринчи бўлиб сотувга чиқарилади. Йил охиригача эса 16 турдаги маҳсулотларни 100 тагача кенгайтириш режалаштирилган.
Таъкидланишича, «Artel» компанияси маҳсулотларини Ўзбекистоннинг ички бозори билан бирга МДҲ, Яқин Шарқ, Шимолий Африка мамлакатларига экспорт қилади. Шу билан бирга «Artel» «Samsung», «Shivaki», «Viessmann» компанияларининг минтақавий ҳамкори ҳисобланади.
Эслатиб ўтамиз, 24 июнь куни «M.Video-Eldorado» гуруҳи бошқарув директори Сергей Ли «Artel»га келганди. У ташриф давомида компания раҳбарияти билан ҳамкорлик масалаларида музокаралар олиб борганди. Бундан ташқари, меҳмонлар ишлаб чиқариш корхоналари билан яқиндан танишганди.
