Президентнинг «Қорақалпоғистон Республикасида Нукус технопарки махсус саноат зонасини ташкил этиш чора-тадбирлари тўғрисида»ги қарори қабул қилинди. Бу ҳақда «Ҳуқуқий ахборот» хабар берди.

Қарор билан «Нукус» эркин иқтисодий зонасидаги 30 гектар бўш ер майдонида Нукус технопарки махсус саноат зонаси 30 йил муддатга ташкил этилади. Халқаро стандартларга мувофиқ энергия тежамкор экологик хавфсиз ишлаб чиқариш қувватларини барпо этиш технопарк фаолиятининг асосий йўналишларидан бири ҳисобланади.

Таъкидланишича, 2023–2024 йилларга мўлжалланган ижтимоий ва ишлаб чиқариш инфратузилмасини ривожлантириш дастури доирасида технопаркнинг муҳандислик-коммуникация инфратузилмасини ривожлантириш учун марказлаштирилган молиялаштириш манбалари ҳисобидан капитал қўйилмалар лимитлари ажратилади.

Технопарк ҳудудида маҳаллий ва хорижий инвесторлар билан узоқ муддатли ўзаро манфаатли шериклик муносабатларини йўлга қўйиш орқали инвестиция фаолиятини рағбатлантириш ва ривожлантириш чоралари кўрилади.

Аввалроқ Қорақалпоғистонда Ёш олимлар академияси ва Ёшлар технопарки ташкил этилиши хабар қилинганди. Шунингдек, Қорақалпоғистон қишлоқ хўжалиги ва агротехнологиялар институти ташкил этилгани, Янги Ўзбекистон университети очилиши ва барча ҳудудларда «Ёшлар ойлиги» ташкил этилгани ҳақида хабар берилган.