Россияда ўзбекистонлик эркакка пневматик қуролдан ўқ узилди
Россиянинг Санкт-Петербург шаҳри Москова туманида ўзбекистонлик эркакка пневматик қуролдан ўқ узилди. Бу ҳақда «78.ru» хабар берди.
Маълум қилинишича, 5 июль куни «Пятёрочка» дўкони маъмурияти 112 рақамига қўнғироқ қилиб, ходими яралангани ҳақида хабар берган. Воқеа жойига етиб келган полиция Ленинский проспектидаги 156-уй яқинида дўконнинг юк ташувчисига пневматик қуролдан ўқ узилганини аниқлаган.
Жабрланувчи 36 ёшли Ўзбекистон фуқароси бўлиб, бел соҳасидаги жароҳат билан касалхонага етказилган. Беморга ёрдам кўрсатилгач, у қониқарли ҳолатда қўйиб юборилган. Ҳозирда воқеа тавсилотлари текширилмоқда.
Аввалроқ Россияда ўзбекистонлик эркак ўз уйида пичоқланганди. Шунингдек, мамлакатда бошидан жароҳат олган ўзбекистонлик эркакнинг жасади топилган.
