Ўзбекистонда ўтган 6 ойда коррупция ҳақида хабар берган қанча одам рағбатлантирилгани маълум қилинди. Бу ҳақда Бош прокуратура матбуот хизмати хабар берди.

Маълум қилинишича, Бош прокуратура томонидан 2022 йилнинг 1-ярмида жами 41 нафар шахслар коррупцияга оид ҳуқуқбузарлик ҳақида хабар бергани ёки коррупцияга қарши курашишга бошқа тарзда кўмаклашгани сабабли рағбатлантирилган.

Рағбатлантирилган шахсларнинг берган хабарларига кўра, 36 та ҳолатда пора олиш ва 5 та ҳолатда бюджет маблағларини жуда кўп миқдордаги қийматда талон-торож қилиш жиноятлари фош этилиб, айбдор шахсларга нисбатан жазо муқаррарлиги таъминланган.

Аввалроқ Коррупцияга қарши курашиш агентлиги директори Акмал Бурҳонов агентликнинг 2021 йилдаги фаолияти юзасидан жамоатчилик олдида ҳисобот берганди. Таъкидланишшича, 2021 йилда 5483 нафар шахс жиноий жавобгарликка тортилган. Бу 2020 йилга нисбатан қарийб 3 баробарга ортганини кўрсатган. Энг кўп коррупция учраган соҳа соғлиқни сақлаш тизими бўлган. Кейинги ўринларда эса банк тизими, халқ таълими, мактабгача таълим, Олий ва ўрта махсус таълим вазирлиги, қишлоқ хўжалиги ва ҳокимиятлар.

Эслатиб ўтамиз, Ўзбекистон коррупция индексида 40 давлатдан ўзиб кетиб, 28 балл билан 140 ўринни қайд этганди. Шунингдек, Ўзбекистонда коррупция ҳолатлари ҳақида хабардор қилиш дастури ишга туширилганди.