Марказий банк 2022 йил июнь ойи учун аҳоли ва тадбиркорлик субъектларининг инфляцион кутилмалари шарҳини эълон қилди.

Июнь ойида ўтказилган сўров натижаларига кўра, келгуси 12 ой учун нархлар ўсиши бўйича аҳоли инфляцион кутилмалари май ойига нисбатан пасайган. Кутилмалар 16,4 фоиз (май ойидаги кўрсаткич 17,6 фоиз бўлган) атрофида шаклланиб, уларнинг медиана қиймати 14,1 фоизни ташкил этган.

Регуляторнинг қайд этишича, инфляцион кутилмалар медиана кўрсаткичининг июнь ойида ўтган ойга нисбатан пасайиши айрим озиқ-овқат маҳсулотлари нархларининг барқарорлашиши сабаб юқорироқ инфляцияни кутаётган респондентлар улуши камайиб бориши билан изоҳланади.

Сўровномада иштирок этганлар томонидан келгуси даврда нархларга оширувчи босим кўрсатиши мумкин бўлган асосий омиллар сифатида импорт товарлари ва асосий озиқ-овқат маҳсулотлари (56 фоиз),
нархларининг сунъий оширилиши (41 фоиз) ҳамда иш ҳақи ва нафақаларнинг оширилиши (34 фоиз) кўрсатилган.

Бизнес вакилларининг инфляцион кутилмалари эса май ойига нисбатан 1,6 фоизга камайиб (май ойида 17,3 фоиз бўлган), 15,7 фоизни ташкил этган. Кутималарнинг медиана қиймати 13,3 фоиз атрофида шаклланган. Июнь ойида тадбиркорлик субъектларининг кўпчилик қисми келгуси 12 ойда инфляция 9–12 фоиз атрофида бўлишини кутмоқда.

Тадбиркорлар кейинги 12 ойда нархлар ошишига иш ҳақи ва нафақаларнинг ошиши (29 фоиз), ёқилғи маҳсулотлари ва транспорт хизматларининг нархлари қимматлашиши (27 фоиз) ҳамда импорт қилинадиган хомашё ва бутловчи қисмлар қимматлашиши (24 фоиз) каби омиллар таъсир этиши мумкинлигини қайд этган.

Аввалроқ Марказий банк 2022 йил март ойи учун аҳоли ва тадбиркорлик субъектларининг инфляцион кутилмалари шарҳини эълон қилганди. Шунингдек, 2022 йил 21 апрель куни Марказий банк асосий ставкани 17 фоиз даражасида ўзгаришсиз қолдиргани хабар қилинган.