Шри-Ланканинг амалдаги раҳбари Готабай Ражапакса истеъфога чиққанидан кейин уч киши президентликка номзод бўлади. Бу ҳақда «Daily Mirror» хабар берди.

Маълум қилинишича, мамлакатнинг амалдаги бош вазири Ранила Викрамасингхе президентлик учун курашмоқда. Шри-Ланка Халқ фронти партияси аъзоси Даллес Алахапперума ва мамлакатнинг етакчи мухолифат гуруҳи – Бирлашган миллий кучлар етакчиси Сажит Премадасу ҳам номзодини кўрсатиши кутилмоқда.

Шри-Ланканинг янги президенти сайлови парламент томонидан тасдиқланганидан кейин 20 июль куни бўлиб ўтади. Ғалаба қозониш учун номзод 50 фоиздан кўпроқ овоз олиши керак.

Маълумот ўрнида, 73 ёшли Ражапакса оммавий норозилик намойишлари туфайли мамлакатни иласи билан тарк этиб, Малдив оролларига кетган. Шундан сўнг, мамлакатда фавқулодда ҳолат эълон қилинган. Шри-Ланкадаги норозилик намойишлари молиявий-иқтисодий инқироз фонида апрел ойида бошланган. Орол давлати хорижий валюта, ёқилғи, нефт маҳсулотлари, ўғитлар, озиқ-овқат ва дори-дармонлар танқислигини бошдан кечирмоқда.

Аввалроқ Шри-Ланкада намойишчилар президентнинг қароргоҳидан 18 млн рупий топгани ва бош вазирнинг уйини ёқиб юборгани ҳақида хабар берилганди.