Украина президенти Владимир Зеленский мамлакатда қолган украиналикларга мурожаат қилиб, уларга ғалабага ишонаётгани учун миннатдорлик билдирди. Бу ҳақда «УНИАН» хабар берди.

Президент олдинда қийин йўл тургани, бироқ Украина ўзини ҳимоя қила олишини таъкидлаган.

«Украина қайта қуриш имкониятига эга бўлади. Мамлакат ўзининг барча ташқи сиёсат мақсадларини амалга оширишга қодир», — деган у.

Зеленский миллионлаб одамлар бунинг учун ҳар бири ўз даражасида сидқидилдан меҳнат қилса, натижа бўлишини айтган.

«Биласизми, негадир, мен Украинада ишлайдиган оддий одамларга жуда камдан-кам миннатдорлик билдирардим. Улар ҳамма нарсага қарамай, шу ерда қолди. Украинага ишонч билан ҳар куни ўз ишини бажарди. Энди эса мен барчангизга миннатдорлик билдирмоқчиман, яхшиямки сизлар борсиз», — деган давлат раҳбари.

Аввалроқ Зеленский уруш юзасидан дунё етакчиларига мурожаат қилганди. Шунингдек, Зеленскийнинг йил охиригача Украинани озод қилиш режаси маълум қилинган.