Африкада номаълум касалликдан уч киши вафот этди
Хасталик аломатлари ҳақида маълумот берилди
Танзаниянинг Линди ҳудудида уч киши бурун қонаши билан кечган номаълум касалликдан вафот этди. Бу ҳақда «The Citizen» хабар берди.
Маҳаллий шифокорлар жами 11 кишида «ғалати» касаллик аниқланганини маълум қилган. Улардан уч нафари вафот этган, икки нафари касалхонага ётқизилган, қолганлари эса изоляция қилинган. Номаълум касаллик ҳолатларини қайд этиш 5 июлдан кейин бошланган.
Симптомлар нафақат бурундан қон кетиш, балки иситма, бош оғриғи ва чарчоқни ҳам ўз ичига олади. Беморларда олинган тест натижасида Эбола ёки Марбург иситмаси, шунингдек, коронавирус аниқланмаган.
Мамлакат президенти Самия Ҳасан Сулуху гипотезага кўра, касаллик атроф-муҳитнинг бузилиши таъсири туфайли пайдо бўлганини айтган. Жумладан, баъзи ёввойи турларнинг ҳаёти жиддий равишда бузилгани, улар аҳоли пунктига яқинлашиши оқибатида инсон саломатлигида ўзгариш кузатилаётгани қайд этилган.
Аввалроқ Қозоғистонда уй ҳайвонлари номаълум касалликдан нобуд бўла бошлаганди. Шунингдек, АҚШ ва Европада болалар номаълум касалликка чалинаётганди.
