АҚШ Тайванга 100 млн долларлик ҳарбий техника сотади
АҚШ Давлат департаменти Тайванга қарийб 108 миллион долларлик ҳарбий техника ва эҳтиёт қисмларни сотишга рухсат берди. Бу ҳақда «Reuters» хабар берди.
Тайван АҚШдан танклар ва ҳарбий машиналар учун эҳтиёт қисмлар ва таъмирлаш қисмлари сотиб олмоқчи. Шунингдек, Вашингтон ҳукумати ва пудратчилардан техник ёрдам сўрамоқда.
«Таклиф қилинаётган сотув транспорт воситалари, ўқ ўқотар қуроллар, қурол тизимлари ва логистика воситаларини ҳушёр ҳолатда ушлаб туради», дейилади Пентагоннинг Мудофаа ва хавфсизлик ҳамкорлик агентлиги баёнотида.
Орол давлати Мудофаа вазирлигига кўра, ҳарбий техника сотиб олиш бўйича келишув бир ой ичида кучга кириши керак. Давлат департаменти ҳисоботида шартнома имзолангани ёки музокаралар якунлангани айтилмаган.
«Хитойнинг ҳарбий таҳдиди кучайиб бораётган бир шароитда ҳарбий техник хизмат кўрсатиш муҳим», дейилган АҚШ баёнотида.
Аввалроқ Хитой АҚШ ва Тайваннинг «провокацияларига» жавобан орол давлатига яқин ҳудудда жанговар машқлар бошлаганди. Шунингдек, Хитой G7 давлатларини Тайван ишига аралашмасликка чақирганди ва Хитой АҚШ самолётининг Тайван узра парвоз қилганига норозилик билдирган.
