Британия ҳаво кучларини Россия билан урушга тайёрланишга чақирди
Буюк Британия ҳарбий-ҳаво кучлари Россия билан урушга тайёр бўлиши кераклиги маълум қилинди. Бу ҳақда «Sky News» хабар берди.
Мамлакат ҳарбий-ҳаво кучлари бошлиғи, ҳаво кучлари маршали Майк Вигстон бу ҳақда гапирган. Маршал Россия ҳозир Буюк Британия ва бутун Европа хавфсизлигига ҳақиқий таҳдид эканини айтан. Унинг сўзларига кўра, Россия Британия ёки унинг NATO иттифоқчиларига таҳдид солганда мамлакат ҳарбийлари рус учувчилари билан жангга тайёр бўлиши керак.
«Украинада нима бўлаётганига қаранг. Бунгача Грузияда нима бўлганини эсланг. Россия тобора тажовузкор бўлиб бормоқда. Биз бу мамлакатдан келадиган ҳар қандай таҳдидларга тайёр бўлишимиз керак», — деган у.
Уингстон британиялик ҳарбий учувчилар иттифоқчи учувчилар билан биргаликда доимий тайёргарлиги уларга россиялик учувчилар билан мумкин бўлган жангида устунлик беришини айтган.
«Бизнинг F-35 ёки Typhoon самолётларимиз душман самолётлари билан тўқнашганда ҳаво жанги содир бўлиши мумкинлиги ҳақидаги таҳдид жуда реалдир. Шунинг учун ўзимизни ва NATO’даги иттифоқчиларимизни қўллаб-қувватлашга тайёрмиз. Бизнинг самолётимиз нафақат Британияни, балки NATO давлатларини ҳам ҳимоя қилади», — дейди маршал.
Россиянинг Украинага бостириб кириши шуни кўрсатдики, ҳаво кучлари замонавий урушда муҳим рол ўйнайди ва инглиз учувчилари сифатли тайёргарликка муҳтож.
«Бизнинг учувчиларимиз ҳар қандай таҳдидга қарши туриши керак, хоҳ у ракета учириш, хоҳ яқин ҳавода жанг қилиш бўлсин», — деган Вингстон.
Аввалроқ Буюк Британия ва АҚШ катта хавф туғдирувчи давлатни маълум қилганди. Шунингдек, Буюк Британия армиянинг жанговар тайёргарлигини оширмоқчилиги ҳақида хабар берилганди.
