Рамзан Қодиров NATO давлатларини демилитаризация қилиш ҳақида гапирди
Чеченистон раҳбари Украинадан кейин қайси давлат нишондалигини айтган
Чеченистон раҳбари Рамзан Қодиров NATO давлатларини демилитаризация қилиш бўйича режалар ишлаб чиқилаётгани ҳақида гапирди. Бу ҳақда у ўзининг Telegram каналида хабар қилди.
Қодировнинг сўзларига кўра, Киевни қўлга киритгач, кейинги нишон Польша бўлади. У «Ахмат» махсус отряди командири Апти Алаудинов билан учрашувда бу ҳақда гапирган.
«Режалар улкан. Биз аллақачон NATO давлатларини демилитаризация қилиш режасини ишлаб чиқмоқдамиз ва Киев қўлга киритилгандан кейин навбатда Польша турибди», — деган Қодиров.
Эслатиб ўтамиз, аввал ҳам Чеченистон раҳбари Россия Польшага ҳужум қилиши мумкинлиги, бунинг учун олти сония етишини айтганди. У Польша Россия билан «жуда ёмон ўйинлар» бошлаганини таъкидлаган ва Польша NATO’да эканини эслатиб, яна бир бор Россия президенти Владимир Путинни қўллаб-қувватлаган.
«Шунчаки, унинг айтган сўзлари биз учун буйруқдан баландроқ. Тарихни ўқинг, Россия ҳар доим барча урушларда ғалаба қозонган», — дея хулоса қилган у.
Аввалроқ Рамзан Қодиров Украинага қандай раҳбар кераклигини айтганди. Шунингдек, Қодиров Украина томонда жанг қилаётган чеченлар ҳақидаги маълумот учун миллион доллар ваъда қилган.
