Ургутда тўйхонадаги оммавий заҳарланиш бўйича қўшимча маълумот берилди
Ҳолат юзасидан терговга қадар текшириш ҳаракатлари бошланган
Ургутдаги тўйхонада одамлар оммавий заҳарлангани хабар қилинганди. Бош прокуратура ҳолат юзасидан қўшимча маълумот берди.
Қайд этилишича, Ургут туманидаги тўйхоналарнинг бирида 18 июль куни бўлиб ўтган маросимда меҳмон сифатида қатнашган 56 ёшли аёл 19 июль куни «Ўткир овқат токсикоинфекцияси» ташхиси билан шифохонага мурожаат қилган.
Бемор аёлга тез тиббий ёрдам кўрсатиш билан бир вақтда юқумли касалликлар бўлими патронаж хизмати томонидан ушбу аёл билан тўй маросимида иштирок этган бир нечта фуқароларнинг хонадонларига борилган ва улар юқумли касалликлар бўлимига таклиф қилиниб, текширишдан ўтказилган. Текшириш вақтида улар ичида яна 10 нафар (9 нафари аёл, 1 нафари эркак) фуқароларда «Енгил овқат токсикоинфекцияси» ташхиси борлиги аниқланган.
Кўрсатилган тез тиббий ёрдам натижасида уларнинг соғлиғи тўлиқ яхшиланган ва 20 июль куни уйига жавоб берилган. Ҳозирда шифохонада фақатгина дастлаб мурожаат қилган бемор аёлга тиббий ёрдам кўрсатиб келинмоқда ва уни ҳам соғлиғи яхшиланиб келаётгани аниқланган. Мазкур ҳолат юзасидан Ургут тумани прокуратураси томонидан терговга қадар текшириш ҳаракатлари олиб борилмоқда.
Аввалроқ Тошкент вилояти Оққўрғон туманида жойлашган 5-сонли боғчада тарбияланувчилар оммавий заҳарланганди. Шунингдек, Хоразмдаги оилаларнинг бирида 5 нафар фуқаро ис газидан заҳарлангани ҳамда уларнинг бир нафар фарзанди вафот этгани хабар қилинган.
