Европа Иттифоқи давлатлари 21 июль куни Россияга қарши еттинчи санкциялар пакетини жорий қилди. Бу ҳақда Европа Кенгаши сайтида хабар берилди.

Россияга қарши янги чеклов чоралари тўпламига «Россия экспортининг энергия манбаларидан кейин энг муҳим элементи бўлган олтинни тўғридан-тўғри ва билвосита олиб кириш, сотиб олиш ёки ўтказишни тақиқлаш» киритилган. Тақиқ Россияда ишлаб чиқарилган ва мамлакатдан экспорт қилинадиган олтинга нисбатан қўлланилади.

Бундан ташқари, санкция рўйхатига 57 нафар жисмоний ва юридик шахс, жумладан, Москва мэри Сергей Собянин, бош вазирнинг биринчи ўринбосари Андрей Белоусов, «Ростех» раҳбари Сергей Чемезов, шунингдек, россиялик актёрлар Владимир Машков, Сергей Безруков ва бошқалар киритилган.

Европа Иттифоқи энг йирик Россия банкига нисбатан ҳам чекловларни кучайтирмоқчи. Келажакда Сбербанк маблағлари ва иқтисодий ресурслари музлатилиши мумкин бўлган молиявий институтлардан бирига айланиши керак.

Бундан ташқари, банкка энди маблағлар ёки иқтисодий ресурслар билан таъминлашга рухсат берилмайди. Қишлоқ хўжалиги ва озиқ-овқат маҳсулотларини сотиш билан боғлиқ битимлар эса бундан мустасно.

Мавзуга доир: Европа Иттифоқи Россияга қарши санкцияларнинг олтинчи пакетини тасдиқлади