Беларусь президенти Александр Лукашенко «AFP» агентлигига берган интервюсида Украинадаги можарога зудлик билан барҳам бериш мумкинлигини, аммо бунинг учун битта шарт бажарилиши кераклигини айтди. Бу ҳақда «Белта» хабар берди.

Давлат раҳбари Киевни музокаралар столига ўтиришга чақирган. «Улар ҳеч қачон Россияга таҳдид солмаслигига рози бўлиши керак», — деган Лукашенко. Унинг сўзларига кўра, Украина ҳеч қачон ўз ҳудудида «Россияга таҳдид солувчи қурол» бўлмаслигига ваъда бериши зарур.

«Денацификация ва бошқа шу каби масалалар бу фалсафа. Асосийси — Россия хавфсизлиги», — деган у.

Бундан ташқари, Лукашенко ҳозирда вазиятни «Украина учун мақбулроқ шартлар асосида» ҳал қилиш мумкинлиги, аммо Украинага можарони якунлашига ҳеч ким йўл қўймаётганини айтган. Сиёсатчи «NATO аъзолари ва америкаликларни» Украина ҳудудида қурол-яроғ жойлаштирилмаслиги кафолатини беришга чақирган. Шундан кейин, Россия Украинага хавфсизлик кафолатларини беришини қўшимча қилган.

Аввалроқ Лукашенко дунёдаги янги «қурол» номини маълум қилганди. Шунингдек, у Россияни ядро қуролидан фойдаланишга тайёр бўлишга чақирганди.