Самарқандда Ўзбекистон маданий мероси бўйича конгресс бўлиб ўтди — фото
Тадбирда 10 та янги китоб-албом ва ноёб китоблар тақдимоти ҳам ўтказилган
Самарқанд шаҳрида 22 июль куни «Ўзбекистон маданий мероси — янги ренессанс пойдевори» мавзусидаги VI Халқаро конгресс очилиши бўлиб ўтди. Тадбир Туризм ва маданий мерос вазирлиги кўмагида ўтказилмоқда, деб хабар берди «Bugun.uz» мухбири.
Қайд этилишича, конгрессда «Ўзбекистон маданий мероси жаҳон тўпламларида» туркумидаги 10 та янги китоб-албом тақдимоти бўлиб ўтди. 25 дан ортиқ давлатдан 350 нафар олим, дунёга машҳур 100 та кутубхона ва музейлар китоб-албомлар серияси устида ишлаган тўплам 60 жилдга етди.
Конгрессда Франция Миллий кутубхонасида сақланадиган ноёб қадимий қўлёзманинг ноёб нашри тақдимоти ҳам ўтказилган. Европанинг етакчи нашриёт уйларидан бири «Müller und Schindler» Мирзо Улуғбек буюртмаси билан яратилган ноёб қўлёзма факсимилени намойиш этди.
Эслатиб ўтамиз, ушбу халқаро конгресс 22–24 июль кунлари бўлиб ўтиши режалаштирилган. Тадбир Ўзбекистон маданий меросини ўрганиш, асраш ва оммалаштириш бўйича Бутунжаҳон жамияти томонидан 10 дан ортиқ халқаро ва 5 та миллий ташкилотлар кўмагида ташкил этилган.
