Украина президенти Владимир Зеленский Россия билан урушни музлатиб қўйишнинг оқибатлар ҳақида гапирди. Бу ҳақда у «The Wall Street Journal»га берган интервьюсида маълум қилди.

Зеленскийга кўра, бир неча йиллик ҳарбий пауза Россияга куч тўплаш ва яна бир қанча вилоятларни эгаллаш имкониятини беради.

«Россия билан ҳарбий можарони музлатиш келажакда янада каттароқ ҳарбий қарама-қаршиликни келтириб чиқариши мумкин. Бу Россияга дам олиш имкониятини берадиган паузани англатади. Улар бу паузадан геосиёсатини ўзгартириш ёки собиқ Совет республикаларига бўлган даъволаридан воз кечиш учун фойдаланмайди», — деган президент.

У Россияни «Украинанинг икки вилоятини ютиб юборган китга қиёслаган.

«Кейин Россия дам олади ва икки-уч йилдан кейин яна иккита вилоятни эгаллаб олади. Шуднан кейин яна можарони музлатиб қўйишни сўрайди. Бу юз фоиз шундай давом этади», — деган у.

Зеленскийнинг қўшимча қилишича, сўнгги беш ойлик воқеалардан сўнг украиналиклар Россия билан музокара ўтказишни истамайди.

«Жамият аввало барча ҳудудларни озод қилиш керак, кейин музокаралар олиб бориши мумкин, деб ҳисоблайди. Халқимиз бунга қодир эканимизга ишончи комил. Ҳудудларни озод қилишни қанчалик тез амалга оширсак, шунчалик кам одам ҳалок бўлади», — деган у.

Аввалроқ Зеленский идораси Путин тарихга бин Лодин каби киришини айтганди. Шунингдек, Зеленский идораси урушни қишгача тугатиш муҳимлигини тушунтирганди.