Тошкентнинг Янгиҳаёт туманидаги ариққа 30 дан ортиқ мушукнинг жасадлари ҳамда мушукларнинг шилиб олинган терилари ташлаб юборилибди, дея хабар бермоқда Telegram’даги «ekologuz» канали.

Таъкидланишича, канал кузатувчилари Янгиҳаёт тумани Хушнуд маҳалла Висол кўчасидан ўтган ариққа 30 дан ортиқ мушукнинг жасади ва шилинган териси ташлаб кетилгани ҳақида хабар берган. «Бизга номаълум бўлган шахслар томонидан 30 дан ортиқ мушукларнинг жасадлари, шилиб олинган терилари ҳамда елим халталарга солинган ичак чавоқлари ташлаб кетилган», дея ёзган кузатувчи.

«Ўзбекистонда бошпанасиз ҳайвонларни ҳимоя қилувчи давлат ташкилоти ташкил этиб, ҳукумат қарорларида уларга совуқон муносабатда бўлганлар учун жавобгарлик масаласини янада кучайтириш вақти етиб келмадимикан?», дея қўшимча қилган канал админи.

Аввалроқ Нукус яқинидаги полигонда 100 дан ортиқ ит ва мушукларнинг жасади топилгани рад этилганди. Шунингдек, Қашқадарёда 16 ёшли йигит мушукка шафқатсиз муносабатда бўлгани ҳақида хабар берилган.