Байден йил бошидан бери бешинчи марта Си Цзиньпин билан телефон орқали мулоқот қилди
АҚШ президенти Жо Байден Тайван минтақасида кескинлик кучайиб бораётган бир пайтда Хитой етакчиси Си Цзиньпин билан икки соатлик музокаралар ўтказди. Бу ҳақда АҚШ Миллий хавфсизлик кенгаши стратегик алоқалар бўйича координатори Жон Кирбининг баёнотига таяниб, «CNN» хабар берди.
Нашрнинг маълум қилишича, стратегик алоқалар бўйича cоординатор суҳбат мавзуларини ошкор қилмаган. «CNN»нинг аниқлик киритишича, бу йил бошидан бери бўлиб ўтган икки давлат раҳбарларининг бешинчи музокарасидир.
Қайд этилишича, Хитой ва АҚШ ўртасидаги кескинлик бир неча йиллардан бери давом этмоқда. Дональд Трамп президентлиги даврида ҳам Вашингтон Пекинга, жумладан, уйғурлар ва Тайван муаммолари юзасидан санкциялар босимини кучайтирган. Сўнгги ҳафталарда эса АҚШ Вакиллар палатаси спикери Ненси Пелосининг Тайван оролига тез орада ташриф буюриш режаси юзасидан баҳслар кучайган.
Ўз навбатида, Пекин «ягона Хитой»ни қўллаб-қувватлаш АҚШ зиммасига юклаган мажбурият эканини эслатиб, Вашингтонни ташрифни бекор қилишга бир неча бор чақирган. Агар оролга ташриф буюрса, Пелоси 25 йил ичида Тайванга борган АҚШ Конгресси палатасининг биринчи спикери бўлади.
Аввалроқ АҚШ президенти Жо Байден Россия ва Хитой етакчилари Владимир Путин ҳамда Си Цзиньпиннинг демократия самарадорлиги борасида шубланаётганини маълум қилганди. Шунингдек, АҚШ президенти Жо Байден ва Хитой раиси Си Цзиньпин 2021 йил 9 сентябрь куни бўлиб ўтган телефон суҳбатида коронавирус тарқалишига қарши кураш, иқтисодиёт ва иқлим каби халқаро муаммоларни муҳокама қилганди.
