Франция президенти Эммануэль Макрон Бениндаги матбуот анжуманида Россия Украинадаги ҳаракатлари орқали глобал гибрид урушнинг янги турини бошлаб берганини айтди. Бу ҳақда «Al Arabiya» хабар берди.

Унинг сўзларига кўра, Москва ахборот, энергия ресурслари ва озиқ-овқатдан қурол сифатида фойдаланмоқда.

«Россия, аслида, глобал гибрид урушнинг янги турини бошлаб юборди. Бу биз, европаликлар учун мутлақо тушунарли. Мен буни Африка қитъаси учун айтяпман», — деган Франсия раҳбари.

Макрон Россия қўшни давлатга ҳарбий бостириб кириш орқали ўз манфаатларини ҳимоя қиладиган сўнгги империал мустамлакачи давлатлардан бири ҳисобланишини айтган. Президент 26 июль куни Камерунда француз жамияти вакиллари билан учрашиб, кўплаб Африка мамлакатлари Россия энергетикаси ва ғалласига қарамлигини таъкидлаган.

«Озиқ-овқат энергия каби Россиянинг уруш қуролига айланди. Биз Африка қитъасига ўзини таъминлашга ёрдам беришимиз керак», — деган Франция президенти.

У минтақадаги озиқ-овқат инқирозига Ғарбнинг Россияга қарши санкциялари сабаб бўлган деган айбловларни рад этган. Шунингдек, Макрон Россиянинг портларни блокировка қилиши ва Украина дон омборларига ҳужуми глобал озиқ-овқат таъминотини тўхтатганини ва Африкада тақчилликка сабаб бўлганини айтган.

Аввалроқ Эммануэль Макрон Европа Россия газига қарам, лекин Франция эмаслигини айтганди. Шунингдек, Франция президенти Борис Жонсоннинг NATO бош котиби бўлишига қарши чиқиши маълум қилинган.