Жисмоний имконияти чекланган ёшлар ўртасида 28 июль куни шахмат бўйича ДХХ кубоги Тошкент шахар босқичи мусобақаси бўлиб ўтди. Бу ҳақда «Bugun.uz» мухбири хабар берди.

Маълум қилинишича, мазкур мусобақа жисмоний имконияти чекланган ва ногиронлиги бўлган 18 ёшдан 30 ёшгача бўлган уюшмаган ёшлар ўртасида шахматни кенг тарғиб қилиш, улар орасида юқори иқтидор ва салоҳиятга эга бўлган ёшларни танлаш, саралаб олиш ва уларни профессионал шахматчилар ва халқаро гроссмейстерлар сифатида тайёрлаш мақсадида ташкил этилди.

Мусобақа Халқаро шахмат федерацияси томонидан тасдиқланган қоидаларга мувофиқ жисмоний имкониятлари чекланган ва ногиронлиги бўлган 18 ёшдан 30 ёшгача бўлган (ўғил болалар) ва 18 ёшдан 30 ёшгача бўлган аёллар (қизлар) ўртасида гуруҳларга бўлинган ҳолда олиб борилган. Унда 100 га яқин ёшлар иштирок этган.

«Мен ёшлигимдан шахмат билан шуғулланиб келаман. Спорт турлари орасида мен энг ёқтирадиганим — бу шахмат. Ёшлигимиздан оила аъзоларимиз ва қариндошларимиз билан ушбу ўйинни ўйнардик. Бундан ташқари, дўстларим билан ўйнаб катта бўлганман. Шунда қанча кўп ўйнаса, шунча юқори марраларга чиқиш мумкинлигини тушуниб етдим.

Бакалаврга кирганимдан кейин мусобақаларда қатнашишни бошладим. Кўзи ожизлар орасида ўтказилган мусобақада 3 ўринни эгаллаганман. Шундан сўнг яна бошқа мусобақада 2 ўринни эгаллаганман. Ушбу мусобақада қатнашганимдан ҳам жуда хурсандман» — дейди мусобақа қатнашчиларидан бири Севара Мирсиддиқова.