Ироқ пойтахтига полиция ва армия бўлинмалари жойлаштирилмоқда
Ироқ армияси ва федерал полиция бўлинмалари тартибсизликлар хавфи туфайли Бағдодга жойлаштирилмоқда. Бу ҳақда «Mashreghnews» хабар берди.
Журналистлар маълумотига кўра, шаҳар марказида ҳарбий техника ва кучайтирилган армия патруллари кузатилган. Ҳарбийлар Ал-Синак кўпригини бетон блоклар билан тўсиб қўйган, бу кўприк Бағдоднинг хавфсиз ҳудуди деб аталадиган «яшил ҳудуд»га олиб келади.
Хавфсизлик чоралари радикал ташкилот тарафдорларининг «яшил ҳудуд» ва унда жойлашган Ироқ парламенти ва ҳукумати қароргоҳларига бостириб кириш ниятида экани ҳақидаги хабарлар фонида кўрилмоқда.
Эслатиб ўтамиз, Ироқ пойтахти Бағдодда 27 июль куни юзлаб намойишчилар парламент биносига бостириб кирганди. Намойишчилар депутатлар йиғилиши ўтказиладиган катта залга кирган. Уларнинг норозилигига мамлакат бош вазири лавозимига илгари сурилган янги номзод сабаб бўлган. Хусусан, номзод Муҳаммад ал-Суданий эронпараст сиёсатчи саналиши ва унинг тарафдорлари Ироқни Эрон билан бирлаштириш тарафдори экани таъкидланган.
