Жиззахда 50 ёшли аёл эрини пичоқлаб ўлдирди — видео
Вилоят ИИБ воқеага нима сабаб бўлганини очиқлади
Жиззах вилояти Зафаробод туманида эр-хотин ўртасида содир бўлган жанжал ўлим билан якунланди. Бу ҳақда вилоят ИИБ ахборот хизмати хабар берди.
Маълум қилинишича, 22 июнь куни 21:00 ларда туманнинг «Узунқишлоқ» МФЙдаги хонадонларнинг бирида вақтинча яшаб келган эр-хотин ўзаро гап талашиб, тортишиб қолган. Жанжал давомида 50 ёшли аёл жаҳл устида ошхона пичоғи билан турмуш ўртоғининг қорин қисмига бир маротаба урган.
Оқибатда жабрланувчи ҳаёт учун хавфли бўлган тан жароҳати билан туман тиббиёт бирлашмаси жонлантириш бўлимига ётқизилган. Бироқ кўрсатилган ёрдамга қарамай, эркак 10 кундан сўнг вафот этган. Таъкидланишича, гумонланувчи олдин ҳам қонунни бузгани учун жазоланган.
Ҳолат юзасидан Жиззах вилояти ИИБ ҳузуридаги Тергов бошқармаси томонидан Жиноят кодексининг 104-модда (Қасддан баданга оғир шикаст етказиш) 3-қисми «д» банди билан жиноят иши қўзғатилган. Айбланувчига нисбатан қамоққа олиш эҳтиёт чораси қўлланилган.
Аввалроқ Сирдарё вилоятининг Сардоба туманида эркак ўғирликка тушган уйида аёлни бир неча маротаба пичоқлаб ўлдирган, Тошкент туманида 5 май куни оилавий келишмовчилик сабаб қайнона келинини пичоқлаган, Наманган шаҳрида эса маст эркак танишини пичоқлаб ўлдиргани хабар берилганди.
Мавзуга доир: Навоийда ота 16 ёшли ўғлини пичоқлаб ўлдирди — видео
