Блинкен ва Лавров Украинада ҳукумат алмашинувини муҳокама қилди
АҚШ Давлат котиби Энтони Блинкен 29 июль куни Россия ташқи ишлар вазири Сергей Лавров билан музокара ўтказди. Бу ҳақда «РБК» хабар берди.
Украинада уруш бошланганидан буён биринича марта ўтказилган суҳбатни Блинкен самимий деб баҳолаган.
«Мен Кремлдан Пол Уилан ва Бриттни Грайнерни озод қилишга чақирдим. Шунингдек, дунё Россиянинг Украинадан ғалла етказиб бериш бўйича Украина, Туркия ва БМТ билан эришилган келишув бўйича ўз мажбуриятларини бажаришини кутаётганини таъкидладим», — дейди АҚШ Давлат котиби.
Унинг таъкидлашича, Лавров Украинанинг демократик йўл билан сайланган ҳукуматини ўзгартириш Россия режаларининг бир қисми эканини айтган.
«Кремлнинг Украина ҳудудини аннексия қилишни давом эттириш режалари ҳақидаги сўнгги баёноти ва вазирнинг Украинанинг демократик йўл билан сайланган ҳукуматини ўзгартириш Россия режаларининг бир қисми эканини ҳисобга олиб, мен Лавровга бу режалар ҳеч қачон қабул қилинмаслигини айтдим. Дунё аннексияларни ҳеч қачон тан олмайди. Агар Россия бу режаларини амалга оширса, биз унга нисбатан қўшимча жиддий санкциялар қўллаймиз», — деган у.
У Лавров бунга қандай жавоб бергани ҳақида изоҳ беришдан бош тортган.
«Ташқи ишлар вазири Лавровнинг ҳеч бир жавобини тавсифламоқчи эмасман», — деган у.
Музокаралар ортидан Россия Ташқи ишлар вазирлиги ҳам Лавров ва Блинкеннинг телефон орқали Украинадаги вазиятни муҳокама қилганини билдирган.
Аввалроқ Лавров Ғарбнинг Россияга қарши «ўйини» ҳақида гапирганди. Шунингдек, Лавров Украина армиясини аслида ким назорат қилаётганини айтганди.
