Вазирлар Маҳкамасининг «Бошланғич, ўрта ва ўрта махсус профессионал таълим тўғрисидаги ҳужжатларнинг давлат намунасини тасдиқлаш ҳақида»ги қарорига ўзгартириш киритилди.

Ҳужжат билан профессионал таълим муассасаларида қўшимча квалификациялар бўйича 6 ойгача бўлган қисқа ўқув курслари орқали ўқиган фуқароларга бериладиган давлат намунасидаги сертификатнинг янги таҳрири тасдиқланган.

Унга кўра икки ой муддатда:

• касб-ҳунар мактаби, коллеж ва техникумларда қўшимча квалификацияни эгаллаш бўйича бериладиган янги намунадаги сертификат бир вақтнинг ўзида ўзбек, рус ва инглиз тилларида бўлади;
• шу билан бирга сертификат электрон шаклларини QR-код ёрдамида олиш ҳам мумкин.

Натижада фуқаролар хорижда вақтинчалик меҳнат фаолиятини амалга ошириш даврида ортиқча овворагарчиликсиз ушбу сертификатдан фойдалана олади.

Маълумот учун, бугунги кунда 255 та профессионал таълим муассасаларида 24 минг нафарга яқин фуқаро 102 турдаги касб бўйича қисқа муддатли курсларда ўқитилмоқда.

Аввалроқ Ўзбекистонда 2023 йилдан техникумдан олийгоҳга имтиҳонсиз кириш механизми бекор қилиниши, техникумларда сиртқи ҳамда кечки таълимни ташкил этиш тартиби белгилангани тўғрисида хабар берилганди.