Украина уруш кечишини ўзгартира олиши маълум қилинди
«The Washington Post» нашри Украина уруш тўлқинини яна бир бор ўзгартириши мумкинлиги ҳақида мақола чоп этди.
Мақолага кўра, Украина армияси илғор артиллерия, жумладан Американинг HIMARS реактив тизими туфайли уруш кечишини қўлга олиши мумкин. Ушбу кўп учирувчи ракета тизимидан фойдаланиб, Украина Россий ҳарбийларини ўқ-дорилар омборларини олдинги чизиқдан узоқроққа кўчиришга мажбур қилган.
Бу орқали бўлинмаларга артиллерия снарядларини етказиб бериш мураккаблашган. Украиналиклар 2 июль куни артиллерия отишмаси остида шарқдаги Лисичанск шаҳридан чиқиб кетганидан кейин Россия қўшинлари муҳим ҳудудий ютуқларга эриша олмагани таъкидланган.
Чекиниш Россияга Луганскни тўлиқ назорат қилиш имконини берган ва бу Россиянинг апрель ойида Киев атрофидан чекинганидан бери эришган ягона муҳим стратегик муваффақияти бўлган. Кўпгина Ғарб расмийлари ва таҳлилчилар тахминига кўра, руслар ҳудудий олға силжиш бўйича ўз имкониятларини тугатишга яқин турибди, чунки уларнинг камайган армияси Украина кучларига янги қўлга киритилган техника билан тўқнаш келади.
Бироқ ҳудудларни деоккупация қилиш кўпроқ Украинанинг ҳарбийлар кучи, артиллерия ва етарлича ўқ-дорилар билан таъминлаш қобилиятига боғлиқ бўлади.
Аввалроқ Зеленский Украина ҳудудларини озод қилиш муддатини айтганди. Шунингдек, Украинадаги уруш қачон ва қандай тугаши маълум қилинган.
