Россиядаги сув омбори ёнидан ўзбекистонлик эркакнинг жасади топилди
Унинг юзи ва қўлида шилинган жароҳатлар аниқланган
Россиянинг Приморск туманидаги сув омбори яқинида ўзбекистонлик эркак ўлик ҳолда топилди. Бу ҳақда «Невские Новости» хабар берди.
Ҳуқуқ-тартибот идоралардаги манбанинг маълум қилишича, 40 ёшли эркакнинг жасади 30 июль куни топилган. Марҳум автосервисда ишлаган ва 30 июль куни Ўзбекистонга қайтиши керак бўлган.
«Чипта маҳаллий вақт билан 11:45 да учиш учун сотиб олинган. Топилган вақтида мигрантнинг юзида кўкаришлар, чап қўлида эса шилинган жароҳатлар аниқланган. Ҳозирда ҳолат юзасидан тергов ҳаракатлари олиб борилмоқда», дейилади хабарда.
Аввалроқ Россиянинг Мурино шаҳридаги қурилиш майдончасида 29 ёшли ўзбекистонлик эркакнинг жасади топилгани хабар берилганди. Шунингдек, мамлакатнинг Ленинград вилояти Всеволожск туманида ҳам ўзбекистонлик эркакнинг ёниб кетган жасади топилгани маълум қилинганди.
