Шавкат Мирзиёев Швейцария президентига табрик йўллади
Мамлакатда Швейцария Конфедерацияси ташкил топган кун нишонланмоқда
Шавкат Мирзиёев 1 август куни Швейцария президенти Иньяцио Кассисга табрик йўллади. Бу ҳақда Президент матбуот котиби хабар берди.
Қайд этилишича, Шавкат Мирзиёев Швейцария Конфедерацияси президенти Иньяцио Кассисга миллий байрам — Швейцария Конфедерацияси ташкил топган кун муносабати билан табрик йўллаган.
Маълумот ўрнида, бу кун Швейцарияда федерал даражада нишонланадиган ягона байрам ҳисобланади. Мамлакат тарихига кўра, 1291 йилда Фирвалдштет кўли яқинида учта энг йирик кантон — Швиц, Ури ва Унтервалден вакиллари учрашиб, ташқи душмандан биргаликда ҳимояланишга келишган . Айнан шу келишув Швейцария конфедерацияси ташкил топишига олиб келган. 1891 йилда Швейцария ташкил топганининг 600 йиллиги нишонланган танатанада 1 август расман байрам сифатида қабул қилинган.
Аввалроқ Шавкат Мирзиёев «Бхаратия жаната парти» ҳукмрон партияси бошчилигидаги Миллий-демократик альянсидан номзод Драупади Мурмуга Ҳиндистоннинг президенти этиб сайлангани муносабати билан табрик йўллаганди.
