АҚШ президенти Жо Байден Афғонистондаги аксилтеррор операцияси натижасида «Ал-Қоида» етакчиси Айман ал-Завоҳирий йўқ қилинганини маълум қилди. Бу ҳақда «CNN» хабар берди.

Байденга кўра, ал-Завоҳирий 30 июль, шанба куни Кобулда дрон ҳужуми оқибатида ҳалок бўлган. АҚШда террорчилик ташкилоти етакчисининг хавфсиз уйга жойлашганини тасдиқловчи манбалар бўлган. «Ал-Қоида» раҳбари уйининг балконида, оила аъзолари бошқа хоналарда бўлганида йўқ қилинган.

«Адолат ғалаба қозонди ва бу террорчи етакчи йўқ. Унинг оила аъзоларидан ҳеч ким жабрланмади, тинч аҳоли орасида қурбонлар йўқ», — деган Байден.

Аввалроқ АҚШ армияси «Ал-Қоида» етакчисини ўлдириш учун Сурияга ҳаво ҳужуми уюштирганди. Шунингдек, «Ал-Қоида» ва «ИШИД» Афғонистонда ўз таъсирини кенгайтираётгани маълум қилинган.