Буюк Британия делегацияси Тайванга ташриф буюради
Буюк Британиядаги Жамоатлар палатасининг Ташқи ишлар қўмитаси 2022 йил охиригача Тайванга ташриф буюради. Бу ҳақда «The Guardian» хабар берди.
Ташрифдан мақсад мамлакатни қўллаб-қувватлашни кўрсатишдир. Сафар йилнинг бошида бўлиб ўтиши режалаштирилганди, бироқ энди у ноябрь ёки декабрь ойида бўлиб ўтиши кутилмоқда. Делегация аъзоларидан бирига коронавирус инфекцияси ташхиси қўйилгани сабабли, сафар режаси кейинга сурилган.
Таъкидланишича, ташриф Тайван бўйича кескинлик кучайганига қарамай амалга ошади. Яқинда Буюк Британия бош вазирлигига номзодлар Лиз Трасс ва Риши Сунак Хитойга нисбатан кескин позицияларини билдирган. Бунга жавобан Хитойнинг Буюк Британиядаги элчиси сиёсатчилар «Хитой таҳдиди деб аталмиш ёлғонни қўзғатаётганини» айтган.
Бундан ташқари, АҚШ Конгресси Вакиллар палатаси спикери Нэнси Пелосининг оролга кутилаётган ташрифи туфайли Хитой билан Ғарб муносабатлари ёмонлашган. Чунки Хитой томони бунга норозилик билдирган ва ҳарбий машғулотлар ўтказишни бошлаган. Тайван ҳам ҳарбий тайёргарликни оширган. АҚШ Тайван яқинида кема ва самолётлар жойлаштиришни бошлаган.
Миш-мишларга кўра, Тайванга Буюк Британия делегациясига Жамоатлар палатаси қўмитасининг амалдаги раиси Том Тугендхат бошчилик қилиши мумкин.
