«Ядро урушида ғолиб бўлиши мумкин эмас» — Путин
Россия президенти бундай урушни қўзғатмасликка чақирди
Россия президенти Владимир Путин ядро урушида ғолиб бўлмаслигини ва уни ҳеч қачон қўзғатмаслик кераклигини айтди. Бу ҳақда «Kremlin.ru» хабар берди.
Президент Ядро қуролини тарқатмаслик тўғрисидаги шартноманинг амал қилишини кўриб чиқиш бўйича X конференцияда бу бўйича гапирган. Путин Россия шартнома матни ва руҳига амал қилишини таъкидлаб, АҚШ билан тегишли қуролларни қисқартириш ва чеклаш бўйича икки томонлама келишувлар бўйича мажбуриятлар ҳам тўлиқ бажарилганини айтган.
Россия раҳбари ядро қуролини тарқатмаслик тўғрисидаги талабларга риоя қилган барча давлатлар ҳеч қандай қўшимча шартларсиз тинч атом энергиясидан фойдаланиш ҳуқуқига эга бўлиши кераклигига ишонч билдирган. Москва атом энергетикаси соҳасидаги тажрибасини ҳамкорлари билан бўлишишга тайёрлиги таъкидланган.
«Биз ядро урушида ғолиб бўлиши мумкин эмаслиги, уни ҳеч қачон қўзғатмаслик кераклигидан келиб чиқамиз. Жаҳон ҳамжамиятининг барча аъзолари учун тенг ва ажралмас хавфсизлик тарафдоримиз», — деган президент.
Аввалроқ Лавров ядро уруши хавфи борлигидан огоҳлантирганди, Пентагон эса бунга жавоб қайтарган. Шунингдек, олимлар ядро уруши сайёрага қандай таъсир қилиши ҳақида маълумот берган.
