Шимолий Корея ядро қуролини тарқатмаслик тўғрисидаги шартномадан чиқди
Бу мамлакатга қандай ҳуқуқ бериши маълум бўлди
Шимолий Корея ядро қуролини тарқатмаслик тўғрисидаги шартномадан қонуний равишда чиқди. Бу ҳақда КХДРнинг БМТдаги доимий ваколатхонасига таяниб, «Газета.ru» хабар берди.
Маълум қилинишича, эндиликда КХДР ўзини ҳимоя қилиш ҳуқуқига эга.
«Шимолий Корея ядро қуроли тарқатмаслик тўғрисидаги шартномадан қонуний тартибда чиққанига анча бўлди. Шунга кўра, ядро қуролига эга бўлган КХДРни ўзини-ўзи мудофаа қилиш ҳуқуқидан фойдаланганликда айблашга ҳеч кимнинг асоси ёки ҳуқуқи йўқ», дейилади КХДР баёнотида.
Аввалроқ Шимолий Корея Бирлашган Миллатлар Ташкилотининг қуролсизланиш бўйича конференция раислигини вақтинча ўз зиммасига олгани маълум қилинганди. Бу бир қатор давлатлар томонидан танқид ва ғазабга сабаб бўлган. Шунингдек, Ким Чен Ин Шимолий Корея қуролли кучларини қайта ташкил этмоқчилиги хабар берилган.
