Исроил Ғазо билан чегарага қўшимча қўшинлар киритди
Чегарага зирхли техника ҳам юборилади
Исроил Мудофаа вазирлиги Ғазо сектори билан чегарадош ҳудудга қўшимча қўшин киритди. Бу ҳақда «Хабар 24» хабар берди.
Қарор маҳаллий гуруҳлар томонидан эҳтимолий ҳужумни олдини олишга қаратилган. Чегарага артиллерия кучлари, зирҳли техника ва махсус кучлар юборилади. Бир қанча автомагистраллар техникаларнинг ҳаракатланиши учун ёпилган.
Исроил ва Ҳамас ўртасидаги ҳарбий можаро 15 йилдан бери давом этиб келмоқда. Бу вақт ичида ўнлаб тўқнашувлар содир бўлган.
«Охирги кунларда кучларимиз юқори шай ҳолатга келтирилди. Анклав аҳолиси ва ҳарбийларга қарши террорчилик ҳаракати хавфи мавжуд. Ҳудуд бўйлаб назорат пунктлари ўрнатилган. Фуқароларнинг хавфсизлиги ҳамма нарсадан устундир», — дейди бўлинма қўмондони Нимрод Алоний.
Аввалроқ Исроил Ғазога ҳаво ҳужумини бошлагани ҳақида хабар берилганди. Шунингдек, Исроил Эронга қарши урушга тайёрланаётгани маълум қилинган.
