Қашқадарё вилоятининг Муборак туманида 1,1 миллиард сўмлик пўлат сув қувурларини ўзлаштириш ҳолати аниқланди, деб хабар беради Бош прокуратура ҳурузидаги департамент.

Маълум қилинишича, департаментнинг Қашқадарё вилоят бошқармаси томонидан терговга қадар текширув ўтказилган. Текширув давомида «Қашқадарё сув таъминоти» МЧЖ Муборак тумани филиали моддий жавобгар шахслари ва бошқалар тумандаги «Кўҳнашаҳар» ва «Амир Темур» ҳудудидан ўтувчи узунлиги 2,5 минг метр бўлган пўлат сув қувурларини ўзлаштиргани аниқланган. Мазкур талон-торожлик баҳоси 1,1 миллиард сўмга баҳоланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Тошкент шаҳри Яккасарой туманида 4 миллиард сўмни талон-торож қилган дорихона бошқарувчиси аниқлангани, Сурхондарёда 2,5 млрд сўмдан ортиқ пулни талон-торож қилган МЧЖ раҳбари ушлангани, Сузиш федерацияси мансабдорлари 1 млрд сўмни талон-торож қилгани тўғрисида хабар берилганди.