Самарқанд вилояти Паст Дарғом туманида 8 март куни фолбин аёл ва унинг қизи ўлдириб кетилган. «Zo‘r TV» телеканалининг «Бу кун» информацион дастурида маълум қилинишича, гумонланувчи судда ўз айбини тан олмаган.

Қайд этилишича, қотилликка гумон қилинган шахс процессуал тартибда ушланган ва ҳозирда суд-тергов ишлари давом этмоқда. Тергов жараёнига айбини тан олган эркак судда қотилликни ўзи содир этмаганини айтган.

Унинг айтишича, қариндоши унга қотиллик саҳнасини тасвирлаб берган: «Биринчи кирдим, у қариб турди, кейин орқамдан кирди, деди. Онасини ўлдириб бўлганимдан сўнг, қизи келиб қолди, уни ўлдирдим деди».

Судга гувоҳ сифатида жалб этилган айбланувчининг қариндоши эса қотиллик ҳақида билмаслигини маълум қилган. Айбланувчининг онаси бўлса, ўғли қотиллик жойидан олдим деган марҳумнинг телефон аппаратини ўртоғидан меҳнати эвазига олганини айтмоқда.

«Бирга ўқиган дўсти телефон дўконида ишлайди. Ана шу дўконга нимадир ясаб берганди, лекин пулини ололмай келаётганди. Телефонни сотдим деб ўзини оқлаб чиқиб кетди, деяпти. Энди шу телефон муаммо», — дейди аёл.

Аввалроқ Нукусда эркак келини ва унинг онасини темир билан уриб ўлдиргани, Фарғонада аёл ичкиликка ружу қўйган эрини ғўла билан уриб ўлдириб қўйгани, Сирдарёда эркак ўғирликка тушган уйида аёлни бир неча маротаба пичоқлаб ўлдиргани тўғрисида хабар берилганди.