Буюк Британияда жазирама иссиқ шароитида жорий қилинган сув чекловлари жами 20,5 миллион кишига таъсир қилиши мумкин. Бу ҳақда «Daily Mail» хабар берди.

Маълум қилинишича, иккита йирик коммунал хизмат кўрсатувчи корхона аллақачон бу бўйича чора-тадбирлар жорий қилган. Улар ўсимликларни суғориш, автомобилларни ювиш, ҳовуз ва фаввораларни тўлдириш учун шланглардан фойдаланмасликка чақирган.

Чекловлар Гэмпшир ва Уайт оролидаги 1,1 миллион кишига таъсир қилган. Бир ҳафта ўтгач, шунга ўхшаш тавсиялар Кент ва Суссексда яна 2,2 миллион киши учун кучга киради. Компанияларнинг ўзлари аҳолини чекловларга риоя қилишни назорат қилишга чақирмоқда.

«Агар қўшнингиз, қариндошингиз ёки дўстингиз сувдан ортиқча фойдаланаётганини сезсангиз, уларга жорий чекловларни эслатиб, батафсил маълумот олиш учун бизнинг веб-сайтимизга йўналтиринг», — дейди «Southern Water» раҳбарияти.

Августь ойида яна иккита йирик сув компаниялари чеклов чораларига қўшилишни режалаштирмоқда. Воқеаларнинг бундай ривожланишида чекловлар Лондон, Оксфорд, Пембрукшире, Темза водийси ва мамлакат жануби-шарқидаги 20,5 миллион кишига таъсир қилади.

Аввалроқ Германияда аҳолига газни тежаш учун кўлларда сузиш тавсия қилинганди. Шунингдек, Японияда энергияни тежаш режими жорий этилганди.