Жиззах вилоятининг Ғаллаорол туманида содир бўлган йўл-транспорт ҳодисаси оқибатида иккита юк машинаси ёниб кетди. Бу ҳақда вилояти Фавқулодда вазиятлар бошқармаси ахборот хизмати хабар берди.

Маълум қилинишича, 6 август куни соат 04:14 ларда 4Р автомобиль йўлининг «Кўкгумбаз» МФЙ Қоронғул қишлоғидан ўтувчи қисмида 36 ёшли С.Л. бошқарувида бўлган «Газель» русумли юк автомобили Ғаллаорол—Жиззах йўналишида бошқарувни йўқотган. Натижада у қарама-қарши йўналишда ҳаракатланиб келаётган 20 ёшли Ж.И. бошқарувидаги фурага тўқнашиб, йўл-транспорт ҳодисаси содир этган ва шундан сўнг «Газел»да ёнғин чиққан.
Ҳодиса оқибатларини бартараф этиш учун Ғаллаорол тумани ФВБ ёнғин-қутқарув бўлинмаси соат 04:31да ёнғин жойига етиб борган ва соат 04:50 да ёнғин тўлиқ бартараф этилган.

Ёнғин натижасида ҳар иккала автомобилининг салон қисми ёниб зарарланган. Жабрланганлар йўқ.
Аввалроқ Жиззахда ҳаракатланиб кетаётган «Hyundai Santa FE» ёниб кетганди. Кўрилган моддий зарар миқдори тахминан 586 миллион сўмни ташкил этган.



