ДТМ ногиронлиги тасдиқланмаган абитуриентларга мурожаат қилди
Ҳозирда маълумотлар тегишли ташкилот томонидан текширилмоқда
Давлат тест маркази директори ўринбосари Сардор Ражабов ногиронлиги тасдиқланмаган абитуриентлар абитуриентларга мурожаат қилди. Бу ҳақда 7 август куни мутасаддининг Telegram каналида хабар берилди.
Қайд этилишича, абитуриентлар томонидан «ногиронлигим тасдиқлангани тўғрисида нима сабабдан менга SMS келмади?» деган мурожаатлар кўп бўлмоқда. Ҳозирда ҳогиронлиги бор бўлган абитуриентларнинг маълумотлари текшириш учун юборилган ва тегишли ташкилот томонидан текширилмоқда.
«Бу имтиёзни қайта текширишдан асосий мақсад ногиронлиги бўлмаган абитуриент ногиронлигим бор деб киритган бўлса ва у алоҳида квотада қатнашиб тавсия этилган тақдирда ҳам олий таълим муассасаси уни ўқишга қабул қилмайди. Шу сабабли уни қайта текшириш учун юборилган.
Тест синовларида иштирок этиш учун ногиронликни тасдиқлангани ёки тасдиқланмаганини алоқаси йўқ, ногиронлиги тасдиқланган абитуриентлар фақатгина танловда алоҳида квотада иштирок этади. Ногиронлиги бор абитуриентларнинг маълумотлари тасдиқланиб келгандан сўнг уларга SMS хабар юборилади», дейилади хабарда.
Эслатиб ўтамиз, Ўзбекистондаги олий таълим муассасаларига 2022/2023 ўқув йили учун кириш тест синовлари 8 август кунидан бошланади ҳамда стадион ва хиёбонларда ўтказилади. Тест синовида иштирок этиш учун «абитуриент рухсатномаси»ни бериш эса 4 августдан бошланган.
