iPhone яна бир мамлакатда ишлаб чиқарилади
Эндиликда смартфон ишлаб чиқариш Хитойдан ташқарида ҳам йўлга қўйилади
Apple эндиликда смартфонлар ишлаб чиқаришни Ҳиндистонда ҳам йўлга қўяди. Бу ҳақда «9To5Mac» хабар берди.
Компаниянинг асосий ҳамкори «Foxconn» Хитойдан ташқарида, масалан, Бразилия ва Ҳиндистонда iPhone ишлаб чиқариш линияларига эга. Хитой iPhone’ни глобал етказиб беришда муҳим бўлиб қолган. Бироқ бу сафар Apple iPhone 14’ни Ҳиндистон ва Хитойда бир вақтда ишлаб чиқаришни бошлаши мумкин. Агар маълумот расман тасдиқланса, бу биринчи ҳолат бўлади.
Маълумот ишончли таҳлилчи Минг-Чи Куо томонидан эълон қилинган. У янги iPhone 14 моделларидан камида биттаси Ҳиндистонда Хитой билан бир вақтда ишлаб чиқарилишини айтган. Янги iPhone Хитойдан ташқарида ишлаб чиқаришни бошлаш учун одатда бир неча ой вақт кетади. Мисол учун, «Foxconn» 2022 йилнинг апрель ойида Ҳиндистонда iPhone 13’ни йиғишни бошлаган, бир неча ҳафтадан сўнг эса Бразилияда ишлаб чиқариш бошланган.
Куонинг сўзларига кўра, Ҳиндистонда iPhone 14 ишлаб чиқариш қуввати қисқа муддатда Хитойдаги ишлаб чиқариш муаммолари сабаб бўлган бўшлиқни тўлдириш учун етарли бўлмайди. Бироқ бу бошқа жойларда ҳам iPhone ишлаб чиқаришни кенгайтиришда «Apple учун асосий босқич» бўлиб қолмоқда.
Аввалроқ iPhone 14’нинг камера блоки намойиш қилинганди. Шунингдек, iPhone 14 Pro Max дизайни маълум бўлганди.
