Европа Иттифоқи Россия билан ҳамкорлик туфайли Туркияга қарши санкциялар жорий қилиши мумкин. Бу ҳақда «Financial Times» хабар берди.

ЕИнинг олти нафар расмийси мазкур маълумотни тасдиқлаган. Улар Европа сиёсатчилари Туркия ва Россия ўртасидаги яқинлашувдан жиддий хавотирда эканини билдирган. Бу, хусусан, икки давлат ўртасидаги товар айирбошлаш ва энергетика, молия ва савдо соҳаларида ҳамкорликни оширишга қаратилган.

Туркияга қарши санкциялар қўллаш бўйича расмий музокаралар ўтказилмаган. Шунга қарамай, европалик расмийлар Москва ва Анқара ўртасидаги муносабатлар ривожини диққат билан кузатиб, керак бўлса жавоб беришга тайёрланмоқда. Масалан, Ғарб компаниялари ва банклари Туркия бозорини тарк этиши ёки ҳеч бўлмаганда мамлакатдаги иштирокини сезиларли даражада камайтириши учун уларга босим ўтказиш имконияти кўриб чиқилмоқда.

«Туркия Россияга жуда яқинлашса, салбий ҳаракатлар бўлишини истисно этмайман», — деган европалик дипломатлардан бири.

Бундай чоралар ҳозирда инфляциядан азият чекаётган Туркия иқтисодиётига путур етказиши мумкин. Айни пайтда Европа давлатларида Анқарага қарши санкциялар бўйича ҳамжиҳатлик йўқ. Катта эҳтимол билан, кўплаб давлатлар ўзлари учун фойдали Туркия бозорини бутунлай йўқотишни хоҳламайди, шунинг учун улар бундай қарорга қарши чиқиши мумкин.

Ўз навбатида, Туркия Россия билан яқинлашса, қандай таҳдидга дуч келишини билади. Бундан ташқари, июнь ойида АҚШ молия вазири ўринбосари турк бизнеси ва банклари вакиллари билан ишчи учрашув ўтказган ва уларни Россия билан ҳамкорлик учун иккиламчи санкциялар жорий этиш ҳақида огоҳлантирган.

Шунга қарамай, Туркия президенти Ражаб Тоййиб Эрдўғон мамлакатда Россиянинг «Мир» тўлов тизими ривожланишини эълон қилган, бу Ғарб санкцияларини четлаб ўтиш имконини беради. Бундан ташқари, Россия ва Туркия Россия гази учун тўловни рублда тўлашга келишиб олган.

Аввалроқ Путин Эрдўғонга Россияда «Байрактар» заводини қуришни таклиф қилганди. Шунингдек, Эрдўғон қайси давлатларнинг сиёсатига ишониб бўлмаслигини айтганди.