Ўзбекистондан Россияга олиб ўтилаётган бир тоннадан ортиқ исириқ бор юк Новороссийск божхона бошқармаси ходимлари томонидан тўхтатилди. Бу ҳақда Федерал божхона хизмати хабар берди.

Маълум қилинишича, юк Яқин Шарқ давлатларидан бирига жўнатилиши керак бўлган. Юк таркибида исриқдан ташқари, қуритилган мевалар, ёввойи гул, зиғир мойи, идиш-товоқ ва қуритилган ўтлар бўлган. Божхоначилар ўсимликдан намуналар олиб, экспертизадан ўтказган ва бу ўт таркибида «ҳармин» моддаси борлиги аниқлаган.

Мазкур ҳолат юзасидан ҳуқуқ-тартибот идоралари ходимлари томонидан наркотик моддалар контрабандаси бўйича жиноят иши қўзғатилган.

Аввалроқ Беларусда исириқ гиёҳванд модда деб эълон қилинганди. Шунингдек, Россияда ўзбекистонлик уч эркак мамлакатга қурут ва асал олиб киргани учун қўлга олинганди.