Фарғонада фуқарони 10 минг доллар эвазига ўқишга киритиб қўйишни ваъда қилган шахс ушланди
У Тошкент халқаро Вестминстер университетига киритишни ваъда қилган
Фарғона ва Сирдарё вилоятларида ўқишга киритиш билан боғлиқ фирибгарлик ҳолатлари фош этилди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Қўқон шаҳар бўлимлари томонидан тезкор тадбир ўтказилган. Тадбирда А.А. исмли шахс фуқаро С.нинг ишончига кириб, унинг қизини 10,2 минг доллар эвазига Тошкент халқаро Вестминстер университетига ўқишга киритиб қўйишини ваъда қилгани аниқланган. У келишилган пулдан 5 минг долларни олган вақтида ашёвий далиллар билан ушланган.
Шунингдек, департамент ҳамда ДХХнинг Оқолтин тумани бўлимлари томонидан ўтказилган тезкор тадбирда Ш.Ў. исмли шахс фуқаро Ў.ни танишлари ёрдамида Тошкент молия институтига ўқишга киритиб қўйиши эвазига 1,8 минг доллар олган вақтида ашёвий далиллар билан қўлга олинган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкентда «Нархоз»га ўқишга киритиб қўйиш учун 3 минг доллар олган кабинет мудири ушлангани, ДХХ Тошкентда фуқарони ўқишга киритиб қўйиш учун 3 минг доллар олган йигитни қўлга олгани тўғрисида хабар берилганди.
