Шавкат Мирзиёев Покистон Ислом Республикаси президенти Ориф Алвий ва бош вазири Шаҳбоз Шарифга ушбу мамлакат мустақиллигининг 75 йиллиги муносабати билан табрикномалар йўллади. Бу ҳақда Президент матбуот хизмати хабар берди.

Қайд этилишича, номаларда Ўзбекистон Покистон билан стратегик шериклик тамойилларига асосланган дўстлик ва кўп қиррали ҳамкорлик муносабатларининг бугунги даражасини ғоят қадрлаши ва бу борадаги улкан салоҳиятни янада рўёбга чиқаришдан манфаатдорлиги қайд этилган. Давлат раҳбари дўст Покистон халқига тинчлик-осойишталик, бардавом равнақ ва фаровонлик тилаган.

Эслатиб ўтамиз, 1 август куни Шавкат Мирзиёев Швейцария Конфедерацияси президенти Иньяцио Кассисга миллий байрам — Швейцария Конфедерацияси ташкил топган кун муносабати билан табрик йўллаганди. Шунингдек, Президент «Бхаратия жаната парти» ҳукмрон партияси бошчилигидаги Миллий-демократик альянсидан номзод Драупади Мурмуга Ҳиндистоннинг президенти этиб сайлангани муносабати билан табрик йўллаган.