Туркия президенти Ражаб Тоййиб Эрдўғон Украинага ташрифи чоғида президент Владимир Зеленскийга Кремль раҳбари Владимир Путин билан учрашишни таклиф қилади. Бу ҳақда «A Haber»га таяниб, «РИА Новости» хабар берди.

Маълумот дипломатик доираларга таяниб эълон қилинган. Эрдўғон Зеленскийга Путин билан учрашишни ташкил қилишни таклиф қилиши кутилаётгани таъкидланган. «CNN Turk»нинг қўшимча қилишича, Зеленский ва Путин Украинадаги уруш учун йўл харитасини белгилаш мақсадида учрашиши мумкин.

«Россия манбаларидан олинган хабарга кўра, Путин Зеленский билан учрашиши мумкин. Россия томони етакчилар йўл харитасини муҳокама қилиб, белгилаши мумкинлигини айтган. Делегациялар шундан сўнг ушбу йўл харитасини амалда қўллашни бошлаши мумкин», дейилади хабарда.

Эслатиб ўтамиз, 18 август куни Львовда Украина ва Туркия президентлари ҳамда БМТ ,ош котиби Антониу Гутерриш ўртасида уч томонлама музокаралар бўлиб ўтади.

Аввалроқ БМТ бош котиби нима сабабдан Украинага бораётгани маълум қилинганди. Шунингдек, Гуттериш Украинага келганда ракеталар учирилгани хабар берилган.