Ҳиндистон жануби-ғарбидаги Керала штатида африка чўчқа ўлати тарқалишни бошлагани ҳақида хабар берилганди. Россияда ҳам мазкур вирус қайд этилди.

Калининград вилоятининг Черняховский туманида африка чўчқа ўлати қайд этилган. Айни пайтда эпидемияни бартараф этиш ва инфекциянинг кейинги тарқалишининг олдини олиш бўйича ишлар олиб борилмоқда. Маҳаллий корхоналардан бирида 20 та чўчқа нобуд бўлган. Ҳайвонларнинг биологик намуналари экспертиза учун юборилганда уларда вирус аниқланган.

Таъкидланишича, июль ойининг охирида Калининград вилоятида икки йилдан ортиқ вақт ичида биринчи марта африка чўчқа ўлати эпидемияси қайд этилган. Бу вирус одамлар учун хавфли эмас, лекин ҳайвонлар учун хавфли саналади. Мазкур вирусга қарши вакцина ёки даво йўқ, унинг тарқалишини фақат қаттиқ карантин жорий этиш орқали тўхтатиш мумкин.

Эслатиб ўтамиз, Россияда маймунчечакка чалиниш ҳолати аниқланган. Касаллик Европада бўлиб қайтган йигитда қайд этилган. Аввалроқ бу касаллик Туркияда ҳам аниқланганди. Шунингдек, болалар орасида ҳам касаллик ҳолати кузатилган.