Львовда 18 август куни Украина президенти Владимир Зеленский ва Туркия етакчиси Ражаб Тоййиб Эрдўғон ва БМТ Бош котиби Антониу Гутерриш ўртасида уч томонлама учрашув бўлиб ўтди. Музокаралар тахминан 40 дақиқа давом этди. Бу ҳақда «Газета.ru» хабар берди.

Зеленский Москва билан музокаралар фақат Россия қўшинлари Украина ҳудудларидан олиб чиқиб кетилгандан кейингина амалга ошиши мумкинлигини айтган.

«Тинчлик музокаралари бошланиши учун, аввало, Россия босиб олинган ҳудудларни тарк этиши керак», — деган Украина раҳбари.

У Россия «Запорожье атом электр станциясидан ўз қўшинларини зудлик билан олиб чиқиб кетиши, провокацияларни бас қилиши» кераклигини ҳам қўшимча қилган. Кейинроқ Зеленский музокаралар чоғида Эрдўғон ва Гутерришдан Россия назорати остидаги ҳудудларда тайёрланаётган «сохта референдумлар»га нисбатан имкон қадар қаттиққўл бўлишни сўраганини айтган.

Туркия президенти, ўз навбатида, учрашувда можарога барҳам беришнинг мумкин бўлган йўллари муҳокама қилинганини айтган.

«Мен уруш охир-оқибат музокаралар столида тугашига ишонаман. Аслини олганда, жаноб Зеленский ва Гутерриш мен билан бу масалада ҳамфикрдир», — деди Эрдўғон.

У Анқара тинчлик жараёнидаги воситачи бўлишга, шунингдек, Истанбул музокараларини қайта бошлашга ёрдам беришга тайёрлигини таъкидлаган. Эрдўғон Россия президенти Владимир Путин билан Львовдаги музокаралар натижаларини муҳокама қилиш ниятидалигини илгари сурган. Туркия президенти, шунингдек, музокаралар чоғида ҳарбий асирларни алмашиш масаласи муҳокама қилинганини айтган.

«Учрашувда биз ҳарбий асирларни алмашишни муҳокама қилдик. Айтмоқчиманки, бу масала бизга ҳам бефарқ эмас.

Бирлашган Миллатлар Ташкилоти (БМТ) Бош котиби Гутерриш Зеленскийга ва Украина халқига уни шундай оғир вақтда меҳмон қилгани учун миннатдорлик билдириб, саммитда Президент Эрдўғаннинг ҳам иштирок этганидан мамнунлигини билдирган.

«Россия томонидан Украинада бошланган уруш ўлим, оммавий қирғин, одамларнинг кўчирилишига олиб келди, шунингдек, инсон ҳуқуқлари билан боғлиқ вазиятни энг кескин тарзда бузилди», — деган Бош котиб.

У «ҳарбий ҳаракатларни тўхтатиш бўйича аниқ музокаралар олиб бориш учун ҳали кўп йўл борлигини» таъкидлаган.

«Биз жанговар ҳаракатларни тўлиқ тўхтатиш борасидаги саъй-ҳаракатларни муҳокама қиладиган вақтдан ҳали жуда узоқдамиз», — деган БМТ Бош котиби вакили ўринбосари Фархон Ҳақ.

Шу билан бирга, Украина ташқи ишлар вазири Дмитрий Кулеба Эрдўғон ҳам, Гутерриш ҳам «Зеленскийни Россия фойдасига ён босишга» чақирмаганини қайд этган.

Аввалроқ БМТ бош котиби нима учун Украинага боргани маълум қилинганди. Шунингдек, Гутерриш қайси давлатни тинчлик рамзи деб билиши айтилган,